劉師奶跑步日誌

2020年11月29日星期日

報名時知道冇咩時間跑, 所以只報了Fun Run (10km), 都要分兩次來完成呢~

之前都係來回跑, 原來咁跑可以唔重覆路線, 不過石峽尾嗰段斜路好辛苦~

從有疫情開始停止咗跑步，至今兩個多月，今日7點半起身，戴外科口罩、cap帽，慢跑，到南昌公園折返，南昌公園都多人活動，下次要改路線。

戴住口罩比起唔戴係呼吸難少少，不過可以接受，亦可能因為太耐冇跑唔夠氣，見到周圍冇人搵地方坐低，除低口罩抖抖。晌法院唔戴口罩跑咗一小段，係唔同嘅。

跑完除咗個外科口罩，換上布口罩去買早餐回家食。一粥麵都整咗膠板間開張四人檯。

6:30起身，7:15出門口，步行到起點附近，石崎家食早餐。8:00左右食完，行去起點，仲有時間，影吓相。今次穿保暖+長袖跑衣，頂到呀，對手冰啲，戴埋手套保暖。

我E區，9:10出發，老公F區，9:25出發。中途應該見到嘅。

5k附近去洗手間，流動洗手間內有廁紙，細心。出來跑一陣見番老公。冇乜力咁，8k食第一支gel，食完又唔覺叉番電，可能肌肉攰，冇練習呀，賽前一次長少少嘅跑步都冇。半馬前係水同能量飲品，每次有站我都飲。

過中間點後感到大、小腿肌肉硬，抽筋！要停低慢慢拉筋，之後已經要行同慢跑咋，逐k倒數，14:34過34k關門點，之後都專心跑，逐個關門點過，差十零分鐘架咋，過埋最後一個閘，入大阪城公園，冇晒力，要行。最後以6:48完成，跑足7個鐘！

今年大阪馬係來回路線，冇咩特色嘅建築物，話平路為主但上落橋暗斜，大斜坡就冇。食物補給冇咩特別，我哋去到已清，睇番其他跑友嘅相，都唔算多款。還有一點，全程大部分時間係曬住，我冇戴帽，曬到頭重重。小朋友就好可愛，想同人拍手，冇人拍佢就好失望咁，哈哈。

不經不覺今星期天就是大阪馬拉松的大日子, 今次實在沒有太多準備, 主要想見識一下那條食街是怎樣~

今次住的酒店是CITY PLAZA OSAKA, 離起點和終點距離不遠, 今年的路線是來回, 我們決定不寄存行李, 跑畢可直奔酒店洗澡休息~

2017年開始抽，今年第三年，終於抽中，可以朝聖啦，老公抽唔中，計劃報KNT嘅馬拉松package，等待中。大阪馬可7月9日前付費。

我哋6點10左右由屋企出發，到大學站大約7點半，出閘已有工作人員指示Shuttle bus位置，係一架雙層城巴呢，等咗一陣就開車喇。幾分鐘就到會場。

去到影吓相，拎印水紙，寄存行李，好快就上線，等3k跑手返晒嚟，大約8點5起跑。

路線直來直往，晌海濱長廊嗰段有攝影師影吓相，之後嘅路就冇喇，去到元州仔公園入口附近折返，7k後試吓加速（去番7分pacing)，睇吓追唔追得上老公，太陽出來了，仲以為會雷暴，天公造美。後來晌9k位置遇番老公，一齊衝線。

跑完有水有香蕉，有嘉年華玩遊戲派零食，時間尚早，排吓啦，keep住行嘅，唔算排得耐。

有卡樂B公仔影相，又排吓啦，個薯片人好搞笑，聽住音樂un un 吓，好入戲，排到差不多到工作人員話公仔要休息，叫我哋去隔離位影（同一個公仔），咁點解唔叫嗰個公仔嚟呢邊呢？呢邊有頒獎台，影相靚啲，呢個安排有待改善。

上272k九巴回大學站，好快到。