香港導盲犬訓練學校 - 建校籌款線上跑2021

香港導盲犬訓練學校-建校籌款線上跑2021-休遊組 

好像有點胖, 由今天起, 每天早點起床, 到樓下跑20分鐘, 一星期五天, 希望一個月後會有點成果~ 假期可以跑長些時間~ 今天儘量簡單, 只帶了電話鎖匙八達通, 明天可以帶水樽放在一旁~

Mt.Fuji International Marathon 2020 Virtual Run

 報名時知道冇咩時間跑, 所以只報了Fun Run (10km), 都要分兩次來完成呢~

九龍西 半馬路線

 https://youtu.be/P1NA5gcqUcM

之前都係來回跑, 原來咁跑可以唔重覆路線, 不過石峽尾嗰段斜路好辛苦~

疫情下跑步

從有疫情開始停止咗跑步，至今兩個多月，今日7點半起身，戴外科口罩、cap帽，慢跑，到南昌公園折返，南昌公園都多人活動，下次要改路線。

戴住口罩比起唔戴係呼吸難少少，不過可以接受，亦可能因為太耐冇跑唔夠氣，見到周圍冇人搵地方坐低，除低口罩抖抖。晌法院唔戴口罩跑咗一小段，係唔同嘅。

跑完除咗個外科口罩，換上布口罩去買早餐回家食。一粥麵都整咗膠板間開張四人檯。

大阪馬拉松 完賽

6:30起身，7:15出門口，步行到起點附近，石崎家食早餐。8:00左右食完，行去起點，仲有時間，影吓相。今次穿保暖+長袖跑衣，頂到呀，對手冰啲，戴埋手套保暖。

我E區，9:10出發，老公F區，9:25出發。中途應該見到嘅。

5k附近去洗手間，流動洗手間內有廁紙，細心。出來跑一陣見番老公。冇乜力咁，8k食第一支gel，食完又唔覺叉番電，可能肌肉攰，冇練習呀，賽前一次長少少嘅跑步都冇。半馬前係水同能量飲品，每次有站我都飲。

過中間點後感到大、小腿肌肉硬，抽筋！要停低慢慢拉筋，之後已經要行同慢跑咋，逐k倒數，14:34過34k關門點，之後都專心跑，逐個關門點過，差十零分鐘架咋，過埋最後一個閘，入大阪城公園，冇晒力，要行。最後以6:48完成，跑足7個鐘！

今年大阪馬係來回路線，冇咩特色嘅建築物，話平路為主但上落橋暗斜，大斜坡就冇。食物補給冇咩特別，我哋去到已清，睇番其他跑友嘅相，都唔算多款。還有一點，全程大部分時間係曬住，我冇戴帽，曬到頭重重。小朋友就好可愛，想同人拍手，冇人拍佢就好失望咁，哈哈。

大阪馬拉松2019

不經不覺今星期天就是大阪馬拉松的大日子, 今次實在沒有太多準備, 主要想見識一下那條食街是怎樣~

今次住的酒店是CITY PLAZA OSAKA, 離起點和終點距離不遠, 今年的路線是來回, 我們決定不寄存行李, 跑畢可直奔酒店洗澡休息~

大阪馬拉松 中選

2017年開始抽，今年第三年，終於抽中，可以朝聖啦，老公抽唔中，計劃報KNT嘅馬拉松package，等待中。大阪馬可7月9日前付費。

Calbee T.H.E Run 2019

我哋6點10左右由屋企出發，到大學站大約7點半，出閘已有工作人員指示Shuttle bus位置，係一架雙層城巴呢，等咗一陣就開車喇。幾分鐘就到會場。

去到影吓相，拎印水紙，寄存行李，好快就上線，等3k跑手返晒嚟，大約8點5起跑。

路線直來直往，晌海濱長廊嗰段有攝影師影吓相，之後嘅路就冇喇，去到元州仔公園入口附近折返，7k後試吓加速（去番7分pacing)，睇吓追唔追得上老公，太陽出來了，仲以為會雷暴，天公造美。後來晌9k位置遇番老公，一齊衝線。

跑完有水有香蕉，有嘉年華玩遊戲派零食，時間尚早，排吓啦，keep住行嘅，唔算排得耐。

有卡樂B公仔影相，又排吓啦，個薯片人好搞笑，聽住音樂un un 吓，好入戲，排到差不多到工作人員話公仔要休息，叫我哋去隔離位影（同一個公仔），咁點解唔叫嗰個公仔嚟呢邊呢？呢邊有頒獎台，影相靚啲，呢個安排有待改善。

上272k九巴回大學站，好快到。

第9屆大阪馬拉松 報名

今年大阪馬是12月1日舉行, 昨天收到消息後立即更改酒店的booking, 之前以為是11月24日舉行~ 起點和終點也在大阪城公園~ 4月5日開始登記抽籤 ~

酒店推薦 : 

• Hotel Keihan Tenmabashi 京阪天滿橋酒店 (近起點)
• HOTEL MYSTAYS Otemae MYSTAYS 大手前酒店
• Dormy Inn Premium Namba Natural Hot Spring 多美迎 PREMIUM 難波飯店 (跑馬後浸溫泉也不錯)

街馬2019

星期五看過醫生，吃了藥，今早沒吃藥，不過可能藥力未散，或小病未癒，起跑後感到非常口乾，一直跑等到4k水站，喝過水和果汁就好得多了。

到7k水站，有一口鮑魚，上年鮑魚在後段才有，我這些慢腳就吃不到，還有龍蝦丸、墨魚丸。老實說跑起上來不是太輕鬆，有上落斜，人又有些不舒服。

接下來的水站有巴馬火腿夾車厘茄，十分美味，後來才知老公沒吃到呢。跑着跑着，跑到學校區，還有沙地，老公說2017年的賽道也是這樣。到12k水站，有魚子醬、山竹牛肉、馬蹄糕等。

跑到啟德隧道，仍有力跑，儘量多跑一些。途中有不少領跑員帶着視障運動員跑，看到他們這麼努力，我都不可鬆懈。出隧道後有水站和蜜柑，很好吃。最後的3k，在公路上，幸好穿了長褲，不然就會被砂石彈到。最後300米，下橋後轉彎，就見到終點，終於完成，大會時間2:40，我的tomtom表是2:32，算是半馬比賽中最好成績。

富士山馬拉松2018

會場同酒店大約5分鐘路程，我哋決定唔寄存行李，跑完直接返酒店。7點半落去食早餐，自助式，食完去門口試溫度，凍呀，返酒店房，着埋保暖衣（好彩星期六去「驚安」買咗咋），8點半落去會場。

酒店過對面馬路，就係F區嘅入口喇，過去排隊。8點8開幕儀式，9點正開跑，放煙花添。我哋過起跑點已經係9:08，跑咗1k，見到富士山，停落嚟影相，繼續跑，有上坡，開始時有力都跑到。9:25同老公影完富士山，之後就分開咗跑，佢跑前面。5k同9k有水站，晌9k個水站食第一支gel，睇睇錶，哇，第一個閘時間快到，唔可以hea跑喇，最後只係早一分鐘過到閘。有睇pacing表（用了7分40做配速）跑，暫時仲跟到，過第二個閘ok。

到差不多21k，嗰個上坡，我諗住跑得到，跑到中途唔掂，要行，個上坡有華景山路咁斜。見到班中學生表演，又跑一陣，過咗呢段上坡就返平路，仲跑到7分幾pacing。

過咗第三個閘，晌補給站見番老公，有飯糰、麵包，食埋支gel，冇晒之前嘅倦怠感，竟然有力跑上坡！之後都係跑吓行吓，第四個閘，早一分鐘過到。呢個時候大約剩番12k。

唔敢怠慢呀，平路跑，斜坡就儘量都跑，而家跟唔到pacing表跑喇，追住閘嘅時間跑。第五、六個閘都係早一分鐘左右過到，剩番40分鐘，要跑5k，都唔係好鬆咋，唔可以行。老公一直晌我前面約100米啦，向住終點進發，唔等得架。見到Last 1km嘅牌，有啲難以置信，係咪真架，因為隻跑錶一直快過大會嘅標示牌幾百米，我都唔肯定跑咗幾多。儘最後努力，跑呀，衝呀！見到老公晌前面，加少少速，睇吓追唔追得番佢，追到，一齊衝線！

呢個馬拉松比舊年神戶難跑呢，睇高度圖以為得半馬個上坡，唔係囉！不過又成功完成一個挑戰！跑到累嘅時候，同日本嘅小朋友High-5吓，又有番D力量繼續跑。

終點附近見到「馬拉松看世界」兩個小編，跑嘅途中我見到佢架喇，因為佢件衫有「馬拉松看世界」嘅字！佢問我哋係咪香港人，話想夾埋幾個獎牌，砌個立體富士山，一齊影相，傾咗一陣散。之後行行吓，另一個小編問我哋完賽證書邊度整，我哋都唔知有，又多樣完成品。

今次book到呢間酒店（Breezbay Lake Resort Kawaguchiko）非常幸運，好適合跑呢個馬拉松，有朋友想跑嘅，記得去Agoda睇吓喇！

馬拉松 預備

子女仲細, 要同老公兩人出門, 要先將佢哋安排妥當, 所以唔可以好似其他跑友咁, 想跑就跑, 再者, 以我哋嘅訓練量, 都未必承受到一年兩個或更多嘅馬拉松~ 唔知到佢哋大啲, 我哋仲跑唔跑到? 到時可以跑多D?

目標

今次跑馬拉松, 以順利, 無傷完賽為目標, 東京實在太吸引, 跑馬後會繼續逛逛逛, 食食食~ 育兒路同跑步路好相似, 育兒路上人人都話要讀名牌學校, 學十八般舞藝, 要贏在起跑線, 要閉上自己耳朵, 堅持自己想法去做~ 跑步, 人人都追求快, 我唔求就另類, 點解一家要sub 3, sub 4, 跑得慢都可以吧~ 享受吓周圍嘅美景, 美食, 過程~

為食跑2018

去年報了，因太大雨取消，今年，又因「山竹」肆虐而改道，起跑後不久就面對大斜坡-環保大道，衝得太快，感覺到心跳非常急促，要慢下來。接着是寵物公園下斜，往後大多是平路（也有些斜路不過是小斜）。回程寵物公園變成上斜，沒氣力跑唯有行。終點前仍有力跑到6分半速，整體成績可以7分速內跑畢10k，跑馬拉松也要呢。

「山竹」後街跑

向奧運方向跑, 西九法院的塌樹未處理, 櫻桃街公園關閉了沒開放, 這幾天看到「九龍樹木組」出沒, 希望城市儘快回復吧!

名馬 無緣

噢, 星期一收到女兒學校的通告, 名馬是在第二次考試期間... 遺憾...

名古屋女子馬拉松2019 中選

今天公佈結果，中選，它付費的連結不知怎的去不到，試幾次才行。要待11月女兒的下學學期時間表出了才知道是否可成行，希望可以吧！

名古屋女子馬拉松2019

今天開始接受登記, 9月21日公佈抽籤結果~ 昨天問老公我想報, 不過有隱憂就是未知道女兒下學期時間表, 不知會否撞着考試, 老公話報了再算, 到時再決定, 好吧~ 都想在自己體力還可以時, 作馬拉松旅遊~

8月份堅持星期一至五每日跑5公里, 完成, LSD沒跑過, 富士山馬拉松只可靠這點點累積~

富士山馬拉松2018 住宿、交通

富士山馬拉松晌河口湖舉行, 住宿、交通真係要度一度, 爬完一輪文, 安排如下:

23/11-24/11
搭HK Express, 下午4點幾到成田機場, 住池袋 b 酒店 (包早餐), 原本想揀新宿, 不過幾貴呀, 池袋啲酒店價錢合理D~

24/11-26/11
Check out 池袋 b 酒店, 搭山手線去新宿, 步行到新南口高速巴士站搭巴士去河口湖, 初時係諗住搭鐵路嘅, 發覺車費幾貴, 同埋擔心唔識搭、搭錯車, 巴士就一定到, 怕塞車就預早少少搭, 3、4個鐘先到都仲OK~

住兩晚Breezbay Lake Resort Kawaguchiko (包早餐), 跑完馬拉松唔想咁趕出番新宿, 住多晚~ 揀到呢間酒店都有D運, 無意去Agoda睇, search到佢, 只剩吸煙房, 但睇過地理位置, 非常近馬拉松起(終)點, 照book, 最多到時用風扇仔吹走D味~

26/11-27/11
Check out Breezbay Lake Resort Kawaguchiko, 怕塞車影響行程(要去睇玩具呀嘛)就搭鐵路, 出番去唔怕搭錯車~ 住東銀座Tokyu Stay Ginza, 因為最後一日去築地, 住東銀座近, 可check out酒店後暫存行李, 行完築地先去拎番, 搭車去上野搭Skyliner去機場~

每日5公里

訂咗呢個目標, 暫時開始咗兩日, 今朝晨跑添, 希望堅持到, 試5日, OK就下星期繼續~